نیشنل کانفرنس اور پی ڈی پی سابق ملی ٹنٹوں کی مدد سے الیکشن لڑ رہے ہیں: رام مادھو

سری نگر: بی جے پی کے سینئر لیڈر رام مادھو نے بدھ کے روز دعویٰ کیا کہ نیشنل کانفرنس اور پی ڈی پی سابق ملی ٹنٹوں کی حمایت سے جموں و کشمیر میں ہونے والے اسمبلی انتخابات لڑ رہے ہیں۔انہوں نے کہا: ‘جہاں تک میری جانکاری کا تعلق ہے تو سابق ملی ٹنٹ کھل کر نیشنل کانفرنس اور پی ڈی پی کے امید واروں کے لئے مہم چلا رہے ہیں’۔

موصوف لیڈر نے ان باتوں کا اظہار بدھ کے روز یہاں کھنموہ میں نامہ نگاروں کے ساتھ بات کرنے کے دوران کیا۔انہوں نے کہا: ‘نیشنل کانفرنس اور پی ڈی پی کا منشور پرانے کی دنوں کی طرف واپس لے جار ہا ہے، ان دونوں پارٹیوں کو چنائو لڑنے کے لئے سابق ملی ٹنٹ کھل کر مدد کر رہے ہیں’۔ان کا کہنا تھا: ‘جہاں تک میری جانکاری کا تعلق ہے تو سابق ملی ٹنٹ کھل کر نیشنل کانفرنس اور پی ڈی پی کے امید واروں کے لئے مہم چلا رہے ہیں’۔

مسٹر مادھو نے کہا کہ جن پارٹیوں اور خاندانوں نے گذشتہ تیس چالیس برسوں سے جموں وکشمیر کے لوگوں کو مصیبتوں میں ڈال دیا، کو شکست دی جائے گی اور نئے امید واروں کو فتح سے ہمکنار کیا جائے گاانہوں نے کہا: ‘جو امن چاہتے ہیں، دہشت گردی کا بالکل سپورٹ نہیں کرتے ہیں،ترقی چاہتے ہیں وہی نئے لیڈر اور پارٹیاں کشمیر میں ابھر کر سامنے آئیں گی’۔ان کا کہنا تھا: ‘جموں وکشمیر میں ایک نئی حکومت قائم ہو رہی ہے اور ہماری پارٹی بھاری اکثریت سے حکومت بنائے گی’۔
مختلف نظریات کے حامل پارٹیوں کے امید واروں کے الیکشن میں حصہ لینے کے لئے کاغذات نامزدگی جمع کرنے پر پوچھے جانے پر بی جے پی لیڈر نے کہا: ‘جمہوریت میں کوئی بھی الیکشن میں حصہ لے سکتا ہے لیکن دہشت گردوں او سابق ملی ٹنٹوں کے سہارے الیکشن نہیں لڑنے ہیں’۔انہوں نے کہا کہ جموں وکشمیر میں اسمبلی چنائو پر امن اور صاف شفاف طریقے سے منعقد ہوں گے جس طرح پارلیمانی انتخابات منعقد ہوئے۔ان کا کہنا تھا کہ وزیر داخلہ امیت 6 یا 7 تاریخ کو جموں وکشمیر کا دورہ کریں گے اور اس کے بعد وزیر اعظم نریندر مودی اور دوسرے لیڈروں کا بھی دورہ ہوگا۔انہوں نے کہا کہ یہ انتخابات تاریخی نوعیت کے ہوں گے۔