سری نگر: وادی کشمیر میں جمعرات کو یوم آزادی کی تقریبات جوش و خروش کے ساتھ منائی گئیں، گرمائی دارلخلافہ سری نگر میں واقع بخشی اسٹیڈیم میں امسال لوگوں کا ٹھاٹھیں مارتا ہوا سمندر دیکھنے کو ملا۔
معلوم ہوا ہے کہ جمعرات کی صبح سے ہی وادی کے اطراف و اکناف سے لوگوں کی ایک بڑی تعداد سری نگر پہنچی جنہوں نے بخشی اسٹیڈیم میں یوم آزادی کی تقریب میں شرکت کی۔اطلاعات کے مطابق وادی کشمیر میں جمعرات کو یوم آزادی کی تقریبات سخت سیکورٹی بندوبست کے بیچ منائی گئیں۔ وادی میں یوم آزادی کی سب سے بڑی تقریب گرمائی دارلحکومت سری نگر میں واقع بخشی اسٹیڈیم میں منعقد ہوئی جہاں لیفٹیننٹ گورنر منوج سنہا نے پرچم کشائی کی رسم ادا کی اور مرکزی نیم فوجی دستوں، جموں وکشمیر پولیس، ہوم گارڈس اور فائر اینڈ ایمرجنسی سروس کے دستوں کی جانب سے پیش کئے جانے والے مارچ پاسٹ کی سلامی لی۔
جموں وکشمیر انتظامیہ نے اس بار بھی یوم آزادی کی تقریبات میں سرکاری ملازمین کی شمولیت کو لازمی قرار دیا تھا۔ حکومت نے اس حوالے سے جاری کردہ سرکیولر میں خلاف ورزی کے مرتکب پائے جانے والے ملازمین کو تادیبی کارروائی کا انتباہ کیا تھا۔یوم آزادی کی تقریبات کے احسن انعقاد اور ملی ٹینٹوں کی طرف سے حملوں کے منصوبں کو ناکام بنانے کے لئے جمعرات کے روز وادی بھر میں سیکورٹی فورسز ہائی الرٹ پر تھی۔
سری نگر میں یوم آزادی کی تقریب کو پر امن طریقے سے انجام دینے کے لئے ڈرونز کا بھی استعمال کیا گیا اور حساس علاقوں میں فقید المثال سیکورٹی بندوبست کیا گیا تھا۔
سری نگر کے حساس علاقوں میں سیکورٹی کے سخت انتظامات کئے گئے تھے اور جگہ جگہ پر ناکے بٹھائے گئے تھے جن پر تعینات سیکورٹی اہلکار ہر آنے جانے والوں کی تلاشی اور ضروری پوچھ گچھ کرتے تھے۔
سری نگر کے سیول لائنز کے مختلف علاقوں خاص طور پر تاریخی لالچوک، مائسمہ ، سونہ وار، ڈلگیٹ ، ٹی آر سی کراسنگ پر بیلٹ پروف گاڑیاں تعینات کر دی گئی تھیں۔کسی بھی ناگہانی واقع سے نمٹنے کے لئے بخشی اسٹیڈیم کے گرد نواح میں جموں وکشمیر پولیس اور نیم فوجی دستوں کی بھاری نفری کو تعینات کیا گیا تھا۔سیول لائنز علاقوں میں سیکورٹی فورسز کے سینئر آفیسروں کو بھی گشت کرتے ہوئے دیکھا گیا اور بھاری تعداد میں سیکورٹی فورسز اہلکار تعینات کئے گئے تھے۔
وادی کے دیگر ضلع صدر مقامات میں بھی یوم آزادی کی تقاریب کے احسن انعقاد کے لئے سیکورٹی کے سخت انتظامات کئے گئے تھے اور صدر مقامات میں داخل ہونے والے پوائنٹس پر ناکے لگائے گئے تھے۔سیکورٹی عہدیدار نے بتایا کہ جموں وکشمیر بھر میں یوم آزادی کی تقریبات کا پر امن انعقاد عمل میں آیا اور کسی بھی جگہ کوئی ناخوشگوار واقعہ پیش نہیں آیا۔
