سری نگر، 13 مئی : شمالی کشمیر کے ضلع بارہمولہ کے اوڑی سیکٹر میں لائن آف کنٹرول پر ہفتے کی صبح در اندازی کی ایک کوشش کو ناکام بنانے کے دوران ایک جونئیر کمشنڈ افسر(جے سی او) معمولی طور زخمی ہوا ہے۔
ایک دفاعی ترجمان نے بتایا کہ بارہمولہ کے اوڑی سیکٹر میں جنگجوئوں کی طرف سے در اندازی کی ایک کوشش کو ناکام بنا دیا گیا۔
انہوں نے کہا کہ طرفین کے درمیان گولیوں کے تبادلے کے دوران ایک جے سی او معمولی طور زخمی ہوگیا۔
ان کا کہنا تھا کہ پاکستان کی طرف سے جائے وقوعہ پر ایک کواڈ کاپٹر اڑانے کی کوشش کی گئی لیکن بھارت کی جانب سے فائرنگ کے بعد وہ واپس چلا گیا۔
دریں اثنا واقعے کے بعد فوج نے اس علاقے میں تلاشی آپریشن شروع کر دیا ہے۔
اوڑی سیکٹر میں در اندازی کی کوشش کو ناکام بنانے کا یہ واقعہ اس وقت پیش آیا ہے جب سری نگر میں ماہ رواں کے اواخر میں منعقد ہونے والے جی ٹونٹی ورکنگ گروپ اجلاس کے پیش نظر جموں وکشمیر کے سرحدوں پر سیکورٹی کو ہائی الرٹ پر رکھا گیا ہے۔
یو این آئی
