سری نگر،14 دسمبر : وادی کشمیر میں ٹھٹھرتی سردیوں کا زور جاری رہتے ہوئے سری نگر میں ایک اور سرد ترین رات درج ہوئی ہے۔
محکمہ موسمیات کے ایک ترجمان کے مطابق سری نگر میں کم سے کم درجہ حرارت منفی3.4 ڈگری ریکارڈ ہوا ہے جو معمول سے2.4 ڈگری سینٹی گریڈ کم ریکارڈ ہوا تھا۔
قبل ازیں سری نگر میں 5 دسمبر کو شبانہ درجہ حرارت منفی3.4 ڈگری سینٹی گریڈ ریکارڈ ہوا تھا اور رواں سیزن کی سرد ترین رات ریکارڈ ہوئی تھی۔
وادی کے شہرہ آفاق سیاحتی مقام گمرگ میں کم سے کم درجہ حرارت منفی 4.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی5.5 ڈگری سینٹی گریڈ ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت منفی5.3 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی3.0 ڈگری سینٹی گریڈ ریکارڈ ہوا تھا۔
سرحدی ضلع کپوارہ میں کم سے کم درجہ حرارت منفی2.8 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی1.7 ڈگری سینٹی گریڈ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت منفی3.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی2.2 ڈگری سینٹی گریڈ ریکارڈ ہوا تھا۔
لداخ یونین ٹریٹری کے ضلع لیہہ میں کم سے کم درجہ حرارت منفی11.5 ڈگری سینٹی گریڈ ریکارڈ کیا گیا جبکہ ضلع کرگل میں منفی11.3 ڈگری سینٹی گریڈ ریکارڈ کیا گیا۔
محکمہ موسمیات کے مطابق وادی میں 21 دسمبر یعنی سردیوں کے بادشاہ چالیس روزہ چلہ کلان کے تخت نشین ہونے تک موسم مجموعی طور پر خشک رہنے کا امکان ہے۔
انہوں نے کہا کہ اس دوران مطلع صاف رہنے سے شبانہ درجہ حرارت میں مزید گراوٹ درج ہوسکتی ہے تاہم دن کے درجہ حرارت میں اضافہ متوقع ہے۔
دریں اثنا وادی میں بدھ کو بھی صبح سے ہی موسم خشک رہا اور ہلکی دھوپ بھی چھائی رہی جس سے لوگوں کو دکان تھڑوں ، پارکوں اور دیگر مقامات پر لطف اندوز ہوتے ہوئے دیکھا گیا۔
یو این آئی
