نئی دہلی/ صدرجمہوریہ رام ناتھ کووند، وزیر اعظم نریندر مودی، لوک سبھا اسپیکر اوم برلا، بھارتیہ جنتا پارٹی (بی جے پی) کے صدر جگت پرکاش نڈا، وزیر دفاع راجناتھ سنگھ اور وزیر داخلہ امت شاہ سمیت کئی وزراء اور لیڈران نے ہفتے کے روز سابق وزیر اعظم اٹل بہاری واجپئی کی سالگرہ پر ان کی سمادھی ’سدایو اٹل‘ پرگلہائےعقیدت نذرکرتے ہوئے انہیں خراج عقیدت پیش کیا ۔
مسٹرمودی نےآنجہانی واجپئی کو خراج عقیدت پیش کرتے ہوئے ٹویٹ کیا ’’محترم اٹل جی کو ان کی سالگرہ پرسلام ۔ ان کی ملک کے لئے خدمات ہم سب کے لیے مشعل راہ ہے ۔ انہوں نے ہندوستان کو مضبوط اور ترقی یافتہ بنانے کے لیے اپنی زندگی وقف کر دی۔ ان کی جانب سے کئے گئے ترقیاتی کاموں نے لاکھوں ہندوستانیوں کی زندگیوں کو متاثر کیا ‘‘۔
مسٹربرلا نے ٹویٹ پر لکھا مسٹرواجپئی پورے ہندوستان کو اپنے ساتھ لے کر چلتے تھے۔ ان کی فکر اور زندگی کی جدوجہد کی کہانی آنے والی نسلوں کے لیے تحریک کا سرچشمہ ہے ‘‘۔
مسٹرنڈا نے کہا ’’ مادر وطن کی خدمت میں اپنی زندگی وقف کرنے والے ہم سب کے رہنما آنجہانی واجپئی کی سالگرہ پر،ان کی سمادھی’ سدیو اٹل ‘جا کر انہیں خراج عقیدت پیش کیا ۔ ملک کی تعمیر میں ان کی خدمات کو ہمیشہ یاد رکھا جائے گا‘‘۔
مسٹر سنگھ نے کہا ’’میں اٹل جی کو ان کی سالگرہ پر سلام پیش کرتا ہوں ۔ وہ ایک عظیم قوم پرست تھے جنہوں نے ایک نامورمقرر، ایک شاعر، ایک قابل منتظم اور ایک قابل ذکر اصلاح پسند کے طور پر اپنی پہچان بنائی ۔ ہندوستان کی عوامی زندگی میں اٹل جی کے تعاون کو کبھی بھلایا نہیں جا سکے گا۔
مسٹر شاہ نے بھی آنجہانی واجپئی کو ان کی سالگرہ پر یاد کرتے ہوئے ٹویٹ بھی کیا ’’مادر وطن کی خدمت کو زندگی کا مقصد بنا کر اٹل جی نے اپنے غیر متزلزل اصولوں اور حیرت انگیز لگن کے ساتھ انتیودیا اور گڈ گورننس کا تصور پیش کر کے ہندوستانی سیاست کو ایک نئی سمت دی ۔ ایسے منفرد محب وطن اٹل بہاری واجپئی کو ان کی سالگرہ پر سلام ۔ مسٹر واجپئی کا جنم 25 دسمبر 1924 کو ہوا تھا ۔ نوے کی دہائی میں وہ بی جے پی کے اہم شخصیت کے طور پر ابھرے اور بی جے پی کی قیادت میں مرکز میں پہلی بار وزیر اعظم بنے۔
نائیڈو نے اٹل بہاری واجپئی کو خراج عقیدت پیش کیا
نائب صدر ایم وینکیا نائیڈو نے سابق وزیر اعظم اٹل بہاری واجپئی کو ان کی سالگرہ پر خراج عقیدت پیش کرتے ہوئے کہا ہے کہ وہ ملک میں سڑک اور مواصلات کے ذریعے مواصلاتی انقلاب کے لئے تحریک کا سرچشمہ تھے۔
انہوں نے کہا ’’آج محترم اٹل جی کی سالگرہ ہے ، ملک ان کی سالگرہ کو گڈ گورننس ڈے کے طور پر مناتا ہے ۔ اٹل جی ملک میں مواصلات اور سڑک کے ذریعے مواصلاتی انقلاب کے علمبرداررہے ۔
مسٹرنائیڈو نے کہا ’’ انتظامیہ کو مقامی سطح پر عام لوگوں کے لیے قابل رسائی بنانا ہی گڈگورننس ہے ۔ دیہاتوں کو ترقی کےقومی دھارے سے جوڑنے کے لیے انتظامیہ کو گاؤں تک عام لوگوں کی زبان میں پہنچانا گڈ گورننس ہے ‘‘۔
یواین آئی
