جالندھر/ پنجاب کے جالندھر میں بدھ کے روز چار مسلح بدمعاشوں نے گرین ماڈل ٹاؤن میں واقع پنجاب نیشنل بینک کے ملازمین کو یرغمال بنا لیا اور تقریباً 17 لاکھ روپے (16 لاکھ 93 ہزار) کی لوٹ مار کرنے کے بعد فرار ہو گئے۔
پولیس نے جوائنٹ کمشنر آف پولیس دیپک پاریکھ کی قیادت میں تحقیقات شروع کر دی ہے۔ انہوں نے بتایا کہ صبح گرین ماڈل ٹاؤن میں واقع انوسینٹ ہارٹ اسکول کے قریب واقع بینک میں گھس کر چار مسلح بدمعاشوں نے کیشیئر دیپک جوشی سے 16 لاکھ 93 ہزار روپے لوٹ لیے۔ بتایا جا رہا ہے کہ ڈاکو پیدل ہی بینک پہنچے تھے۔
انہوں نے اپنی جیکٹ میں تیز دھار ہتھیار چھپا رکھے تھے۔ ڈاکوؤں میں سے ایک کے پاس دیسی ساخت کی پستول بھی تھی۔ انہوں نے بینک کے تمام ملازمین کو لاکر روم میں بند کر دیا اور 45 منٹ میں پیسے لے کر فرار ہوگئے۔
واقعہ کے بعد موقع پر پہنچی ڈویژن چھ کی پولیس اور فارنسک ٹیم پہنچ گئی ہے۔ پولیس سی سی ٹی وی کیمروں کی مدد سے بدمعاشوں کو تلاش کررہی ہے۔
یواین آئی
