نئی دہلی: جموں وکشمیر سمیت ملک بھر میں آج روشنی کا تہوار دیوالی منایا جا رہا ہے اور اس موقع پر عوام میں جوش و خروش نظر آ رہا ہے۔ اس موقع پر مختلف سیاسی لیڈران کی جانب سے عوام کو مبارک باد پیش کی جا رہی ہے۔ وزیر اعظم نریندر مودی نے دیوالی کے موقع پر ملک کے باشندگان کی خوشحالی کے لئے نیک خواہشات پیش کی ہیں۔

جموں وکشمیر میں روشنیوں کا تہوار دیوالی جوش وخروش کیساتھ منایا جارہا ہے ۔جہاں ہندو برادری کے لوگ مندروں میں خصوصی پوجا پاٹ میں حصہ لے رہے ہیں ،وہیں سیکیورٹی فورسز کیمپوں میں بھی فوجی جوان دیوالی منا رہے ہیں ۔

وزیر اعظم نریندر مودی نے ٹوئٹ کیا، ’’دیوالی کے مبارک موقع پر ملک کے باشندگان کو دلی مبارک باد۔ میری تمنا ہے کہ یہی روشنی کا تہوار آپ کی زندگی میں خوشی، خوشحالی اور خوش قسمتی لے کر آئے۔

مرکزی وزیر امت شاہ نے اس موقع پر ملک کے باشندگان کو مبارک باد پیش کرتے ہوئے کہا کہ لوگوں کی زندگی میں روشنی، نئی توانائی لے کر آئے۔ انہوں نے ٹوئٹ کیا، ’’سبھی کو دیوالی کی دلی مبارک باد۔ روشنی اور خوشیوں کا یہ عظیم تہوار سبھی کی زندگی میں نئی توانائی، روشنی، شفایابی اور خوشحالی سے روشن کرے۔‘‘