سری نگر/ شمالی کشمیر کے قصبہ لولاب میں گذشتہ شب ایک تیز رفتار سکوٹی نے 55 سالہ راہگیر کو ٹکر مار کر ابدی نیند سلا دیا۔
سرکاری ذرائع نے بتایا کہ لولاب کے درد پورہ علاقے میں منگل کی شب قریب ساڑھے نو بجے ایک تیز رفتار سکوٹی نے ایک راہگیر کو اس وقت زورد دار ٹکر مار کر شدید زخمی کر دیا جب وہ ایک کراسنگ پار کر رہا تھا۔
انہوں نے بتایا کہ زخمی شہری کو فوری طور سب ضلع ہسپتال سوگام پہنچایا گیا جہاں ڈاکٹروں نے اس کو نازک حالت کے پیش نظر شیر کشمیر انسٹی ٹیوٹ آف میڈیکل سائنسز (سکمز) صورہ ریفر کیا جہاں وہ زخموں کی تاب نہ لا کر دم توڑ بیٹھا۔
متوفی کی شناخت ولی محمد نجار ولد عبدالعزیز نجار ساکن درد پورہ لولاب کے بطور ہوئی ہے۔دریں اثنا ایک پولیس افسر نے واقعے کی تصدیق کرتے ہوئے کہا ہے کہ اس ضمن میں ایک مقدمہ درج کرکے تحقیقات شروع کی گئی ہیں۔
یو این آئی
