واشنگٹن، 29 اکتوبر (یو این آئی/ اسپوتنک) امریکی صدر جو بائیڈن G-20 چوٹی اجلاس میں شرکت کے لیے روم (اٹلی) پہنچ گئے ہیں۔
وائٹ ہاؤس نے جمعہ کو یہ اطلاع دی۔ وائٹ ہاؤس کی طرف سے جاری ایک بیان میں کہا گیا ہے کہ مسٹر بائیڈن اور محترمہ جل بائیڈن کے طیارے نے مقامی وقت کے مطابق صبح 2.30 بجے روم میں لینڈ کیا۔ مسٹر بائیڈن کے ساتھ موجود نامہ نگاروں کے مطابق مسٹر بائیڈن کے استقبال کے لیے ہوائی اڈے پر پہنچنے والے وفد کے ارکان سے کچھ بات چیت کی اور اس کے بعد صدارتی قافلہ ہوائی اڈے سے روانہ ہوا۔
وائٹ ہاؤس کے مطابق، مسٹر بائیڈن جمعہ کے آخر میں پوپ فرانسس کے ساتھ ایک نجی ملاقات کریں گے۔ اس کے بعد وہ فرانسیسی صدر ایمانویل میکخواں اور اطالوی وزیر اعظم ماریو ڈریگھی سے ملاقات کریں گے۔
مسٹر بائیڈن اٹلی میں جی سمٹ میں شرکت کریں گے۔ اس کے بعد وہ اقوام متحدہ کے کنونشن آن کلائمیٹ چینج (یو این ایف سی سی سی) سی او پی 26 میں شرکت کے لیے گلاسگو (اسکاٹ لینڈ) جائیں گے۔
یو این آئی
