جنوبی کشمیر کے قاضی گنڈ میں دو غیر مقامی افراد سے اسلحہ بر آمد

سری نگر، 6 مارچ: سیکورٹی فورسز نے جنوبی کشمیر کے قاضی گنڈ علاقے میں گذشتہ شام دو غیر مقامی افراد کو گرفتار کرکے ان کی تحویل سے اسلحہ بر آمد کرنے کا دعویٰ کیا ہے۔
سرکاری ذرائع نے بتایا کہ جنوبی کشمیر کے قاضی گنڈ علاقے میں جواہر ٹنل کے نزدیک جمعے کی شام سیکورٹی فورسز نے ایک سینٹرو گاڑی زیر نمبر JK04- 9750 کو روک کر اس کی تلاشی لی۔
انہوں نے بتایا کہ تلاشی کے دوران گاڑی میں سوار دو افراد کو گرفتار کیا گیا جن کی تحویل سے ایک پستول اور 20 گولیاں بر آمد کی گئی۔
گرفتار شدگان کی شناخت محمد دانش صدیقی ولد شمشاد صدیقی اور محمد نوشاد ناوی ولد محمد یونس ناوی ساکنان اترپردیش کے بطور ہوئی ہے۔
مذکورہ ذرائع نے بتایا کہ گاڑی کو ضبط کیا گیا ہے اور گرفتار شدگان کی مزید پوچھ تاچھ کی جا رہی ہے۔
یو این آئی ۔