راہل گاندھی ‘سیاحت کی سیاست’ کر رہے ہیں: شاہنواز حسین

سری نگر،/ بھارتیہ جنتا پارٹی (بی جے پی) کے قومی ترجمان سید شاہنواز حسین نے کہا کہ کانگریس کے سابق صدر راہل گاندھی ‘سیاحت کی سیاست’ کر رہے ہیں۔ انہوں نے کہا کہ کانگریس پارٹی ملک میں انتخابات میں حصہ لینے سے گھبرا رہی ہے موصوف ترجمان نے یہ باتیں یو این آئی کے ساتھ ایک انٹرویو کے دوران کہیں۔
ان کا کہنا تھا: ‘کانگریس پارٹی ملک میں اب انتخابات میں حصہ لینے میں غیر سنجیدہ ہے۔ راہل گاندھی "سیاحت کی سیاست” کر رہے ہیں، وہ بہار میں انتخابات کے دوران دو دنوں تک قیام کرنے کے بعد چھٹیاں منانے کے لئے شملہ چلے گئے’۔
مسٹر حسین نے کہا کہ جموں و کشمیر کے لوگوں کو ترقی کے لئے وزیر اعظم نریندر مودی کا ساتھ دینا چاہئے۔
انہوں نے کہا: ‘میری جموں و کشمیر کے لوگوں سے اپیل ہے کہ وہ ترقی کے لئے وزیر اعظم نریندر مودی کا ساتھ دیں۔ مرکز میں ہماری حکومت ہے اور ہماری حکومت عرصہ دراز تک رہنے والی ہے’۔
موصوف ترجمان نے کہا کہ کانگریس نے پچاس برسوں تک ملک پر حکومت کی لیکن آج ان کے پاس دکھانے کے لئے کچھ بھی نہیں ہے۔
انہوں نے کہا کہ جب کانگریس تعمیر و ترقی کا کوئی کام کئے بغیر ہی پچاس برسوں تک حکومت کر سکتی ہے تو ہم قوم کی خدمت کرنے کے لئے طویل مدت تک مرکز میں کیوں نہیں رہ سکتے ہیں۔
شاہنواز حسین نے کہا کہ وزیر اعظم نریندر مودی جموں و کشمیر کی ترقی کے لئے پرعزم ہیں۔
انہوں نے کہا: ‘وزیر اعظم نریندر مودی جموں و کشمیر کی ترقی کے لئے پرعزم ہیں وہ جموں و کشمیر میں ملی ٹنسی کا خاتمہ کر کے یہاں کے سیاحتی شعبے کو فروغ دینا چاہتے ہیں اور ہم ضلع ترقیاتی کونسل کے انتخابات ترقی کے منشور پر ہی لڑنا چاہتے ہیں’۔
مسٹر حسین نے کہا کہ بی جے پی جموں وکشمیر کو چوبیس گھنٹے بجلی فراہم کرے گی اور دور افتادہ دیہات میں سڑکوں کو جال بچھایا جائے گا۔
انہوں نے کہا کہ طلبا کے لئے معیاری تعلیم حاصل کرنے کے لئے جموں وکشمیر میں ہی بہترین کالج اور یونیورسٹیاں قائم کی جائیں گی تاکہ انہیں ملک کی باقی ریاستوں کا رخ نہ کرنا پڑے۔
موصوف نے کہا کہ کانگریس پارٹی، بی جے پی سے خوفزدہ ہے اور ان کا ابھی بھی پیپلز الائنس برائے گپکار اعلامیہ کے ساتھ درپردہ اتحاد ہے۔
انہوں نے کہا کہ وزیر داخلہ امت شاہ کی طرف سے پردہ چاک کرنے کے بعد کانگریس نے "گپکار اعلامیہ’ سے دوری اختیار کی۔
شاہنواز حسین نے کہا کہ وادی میں کئی ترقیاتی پروجیکٹوں کے شروع کرنے میں کورونا وبا آڑے آیا لیکن انہیں اب بہت جلد شروع کیا جائے گا۔
انہوں نے کہا کہ کانگریس نے ڈر کے مارے ‘گپکار اعلامیے’ سے ٹانگ باہر نکالی تاکہ ہمیں ملک میں ‘کانگریس گپکار’ کا نام نہ پڑ جائے۔
ان کا کہنا تھا کہ جموں و کشمیر کے لوگوں کو وزیر اعظم نریندر مودی کی سربراہی والی بی جے پی حکومت پر پورا اعتماد ہے۔
یو این آئی