بانڈی پورہ میں آگ، شاپنگ کمپلیکس خاکستر

سری نگر/ شمالی کشمیر کے ضلع بانڈی پورہ کے آلوسہ گاؤں میں مقامی اوقاف کا ایک شاپنگ کمپلیکس، جس میں رہائشی سہولیات بھی میسر تھیں، اتوار اور پیر کی درمیانی شب آگ کی واردات میں خاکستر ہوگیا۔
مقامی ذرائع نے بتایا کہ آلوسہ میں قائم مقامی اوقاف کے اس شاپنگ کمپلیکس میں رات کے قریب دو بجے آگ کے شعلے نمودار ہوگئے جنہوں نے کمپلیکس کے چھ دکانوں اور چار کمروں کو چشم زدن میں اپنی لپیٹ میں لے لیا۔
انہوں نے بتایا کہ فائر اینڈ ایمرجنسی سروسز کی گاڑیاں اور نفری آنے تک آگ نے کمپلیکس کو راکھ کے ڈھیر میں تبدیل کر دیا تھا۔
مقامی لوگوں نے بتایا کہ کمپلیکس میں ایک میڈیکل لیبارٹری، کمپیوٹر سروسز و ساز و سامان کی ایک دکان کے علاوہ بھی مختلف قسموں کے چیزوں کی دکانیں تھیں۔
انہوں نے بتایا کہ آگ سے لاکھوں روپیوں کا نقصان ہوا ہے تاہم آگ لگنے کی وجوہات ابھی معلوم نہیں ہوسکی ہیں۔