جموں وکشمیر میں کورونا کے 23 نئے مثبت کیسز سامنے آئے، تعداد 207 ہوگئی

سری نگر، 10 اپریل : جموں وکشمیر میں جمعہ کے روز کورونا وائرس کے 23 نئے مثبت کیسز سامنے آئے جس کے ساتھ اس یونین ٹریٹری میں اب تک سامنے آنے والے مصدقہ کیسز کی تعداد بڑھ کر 207 ہوگئی ہے۔
جموں وکشمیر حکومت کے ترجمان روہت کنسل نے اپنے ایک ٹوئٹ میں کہا: ‘مثبت کیسز کی تعداد بڑھ کر 207 ہوگئی ہے۔ مصدقہ کیسز میں سے جموں سے 39 جبکہ کشمیر سے 168 کیسز سامنے آئے ہیں’۔
کورونا وائرس کے متاثرین میں سے اب تک متعدد مریض صحت یاب ہوئے ہیں جبکہ چار کی موت واقع ہوئی ہے جن میں سے تین کا تعلق کشمیر سے جبکہ ایک کا تعلق جموں سے تھا۔
دریں اثنا کورونا وائرس کے مثبت کیسز میں روز افزوں ہورہے اضافے کے ساتھ وادی کشمیر میں جہاں ایک طرف لاک ڈاؤن سخت سے سخت تر ہو رہا ہے وہیں لوگوں میں بھی اضطراب و بے قراری بڑھتی ہی جارہی ہے۔
وادی میں جمعہ کو مسلسل 23 ویں روز بھی مکمل لاک ڈاؤن جاری رہنے سے جہاں متواتر تیسرے ہفتے بھی نماز جمعہ کی ادائیگی معطل رہی وہیں معمولات زندگی بھی بطور کلی ٹھپ ہیں جس کے باعث لوگوں کو درپیش مشکلات میں مزید اضافہ ہوا ہے۔
انتظامیہ نے جہاں وائرس کی روک تھام کو یقینی بنانے کے لئے سری نگر و دیگر اضلاع کے درجنوں علاقوں کو ریڈ زون قرار دیا ہے وہیں لاک ڈاؤن کو ممکن بنانے کے لئے بیشتر جہگوں پر گھر سے باہر نکلنے والے ہر کس و ناکس کو زد کوب کیا جاتا ہے۔